Posts Tagged: 香港

英國唔可以再快樂學數學?

英國唔可以再快樂學數學?

外國既學習風氣一向都好自由好輕鬆,係唔少香港學生既理想學習地。不過之前睇到台灣中時電子報既報道,話原來歐美國家既中小學生竟然唔強迫仍佢地學乘法口訣,考試太過依賴計數機導致基礎運算能力不足。相比之下大陸上海中學生既數學能力傑出,係2012年國際學生能力評量計劃(簡稱PISA)入面既數學測驗獲得全球冠軍。係個次PISA計劃打入前10強既歐美國家分別係列支敦士登、瑞士同荷蘭,英美兩大強國唔單止入唔到10強,令人大跌眼鏡既係,英國中學生既PISA數學成績仲落後上海中學生3年咁多!     搵番BBC既報道,今次排名入面亞洲國家同地區包辦頭五名幾乎威盡國際,依次序係上海、香港、新加坡、日本同韓國。一向被視為教育產業大國既英國與美國分別排第二十名同第二十八名,鬥唔過排名第十二位既越南,而非洲既加納就包尾。OECD話,如果英國可以減低有關數字,可以為英國經濟帶黎成萬億既經濟回報咁話wor。     結果,英國教育部dump左4100萬英鎊引入「上海教學模式」,將來會俾英國半數以上、大約8000所中小學採用,目前已經英國有70幾個小學老師去上海師範大學接受培訓,之後仲會直接走入上海43間小學教室,親身觀摩上海數學老師係點教數學。     根據呢套「上海教學模式」,每一堂既設計都只圍繞單獨一個數學概念,無論係最基本既加法定係對等式或分數的理解,只要有一個學生掌握唔到呢個概念,老師就唔會講新既內容。咁做既目的係保證重要既概念會課堂上完全被學生掌握,將來就唔洗再講多次。有批評意見認為個啲數學拔尖既學生會覺得無聊,學習積極性受到打擊。 重複強調概念係上海數學教育既一個基本要素。孩子們由5歲開始就通過不斷重複黎掌握每一個基礎概念。一個學生回答老師既問題之後,其他學生一齊重複同樣答案。另一個學生回答另一個問題,全體學生再一起重複同樣答案。 Sheffield Hallam University 發表對上海教學模式既評估報告,指出老師每天只須教兩堂每堂40分鍾既課,其他時間都用黎提高教學質素,包括同行feedback同聽課觀摩。更重要既係,上海數學教師係任職前要上五年大學,期間要專修一科小學數學教育既課程。即係話師資同備課都備受重視。   基礎既數學能力係要既,但係一味死記硬背就真係有用?尤其是兩者文化完全唔同,一味照辦煮碗未必行得通。係亞洲地區依家高叫「愉快學習」既年代下,西方教育反過黎學番中式教育,實在諷刺。 封面圖片來源:阿波羅新聞網

中國醫術正式打入美國市場,但係香港又點樣?

中國醫術正式打入美國市場,但係香港又點樣?

唔知大家對「屠呦呦」呢個名有無印象呢?呢個人係2015年諾貝爾醫學獎得主黎架,用黎表揚佢利用中醫知識研發出抗瘧疾藥,挽救左無數貧困地區既生命。另一方面,擁有347年歷史既老字號中藥舖「北京同仁堂」尋日係紐約創始店搞左個開幕記者會上宣布進軍美國,總經理丁永玲話希望透過中式醫藥服務同建立生活觀念令到美國民眾親身感受到中國傳統醫藥既奧妙神奇咁話wor。   唔講唔知,原來美國係2002年開始正式俾中醫藥進入補充替代醫學系統,依家有51個州已經設立左中醫藥既相關法律規範,依家北京同仁堂成千種中藥產品當中暫時得10種成功通過FDA認證以「食品補充劑」既形式係市面出售,包括大家成日都聽到既六味地黃丸、牛黃丸、十全大補丸咁。     內地中醫藥行業大舉進軍美國市場,咁香港又點呢?中醫依家係香港既地位其實係高不成低不就,自從中醫係2003年沙士一疫立功之後,大家就開始關注中醫既療效,大量打住中醫旗號既補健品亦都應運而生,咩冬蟲夏草、靈芝孢子既產品大行其道。政府亦都開始加大對中醫既投資。根據政府資料,醫院管理局自2003年起逐步係全港18區設立中醫教硏中心。政府亦係2014年既施政報告入面預留一幅土地準備起中醫院,話要將會提供中醫住院服務,但係去到2016年依然都只係紙上談兵。     雖然政府有意發展中醫產業,但係進度似乎相當緩慢,政府暫時都係拎唔出咩實質計劃出黎,而係制度上面仲係存在唔少差別對待既問題。例如話中醫師唔可以開西藥啦、唔可以轉介病人照X光同開化驗單等等,令唔到唔少病人寧願優先選擇西醫。另外,市民對於既觀念依然有誤解,例如覺得中醫本身唔夠科學、面對西醫個陣唔想同醫生講佢地有食中藥因為佢地覺得醫生會鄙視。如果政府唔好好教育市民大眾同儘快落實推動中醫既政策既話,恐怕中醫既地位只會繼續成為西醫既陪襯品。 封面圖片來源:mapio.net

2020年將會係無膠年代?可惜香港唔會有份

2020年將會係無膠年代?可惜香港唔會有份

封面圖片來源:ticotimes.net   岩岩先睇到新聞,話法國意識到塑膠污染既危險,近日成功立法,成為全世界第一個禁止出售不可分解塑膠餐具既國家。新法將會係2020年1月1日起正式生效,廠商到時要確保餐具用「生物可分解材料」製造。根據報道,法國每年製造47億個膠杯,但得大約1%成功回收。立法之後有關製造商會有4年緩衝期,確保所有即棄餐具可被生物分解、必須使用天然材料同禁止商家提供塑膠袋。     根據聯合報既報導,塑膠係全球最多人使用既材料之一,自1964年以黎塑膠生產量增加20倍,去到2014年已經去到3億100萬噸,預計未來20年仲會倍增。 塑膠既危害相信大家都好清楚,但係唔少人都認同塑膠確實好處多多,例如膠袋輕身又防水,膠刀膠叉方便攜帶,用完唔需要再沖洗的確好方便。但係同時塑膠因為無法被微生物分解需要極長時間先慢慢分解,而且大多數塑膠係分解過程中(無論係自然降解定係焚化)都會釋出有毒物質污染環境,最後隨住食物鏈累積再進入人體引起一連串既健康問題,而且流入大海之後仲會被動物誤食導致死亡,危害極大。有環保團體預計到左2050年,海洋入面既垃圾重量將多過魚類。真係諗起都毛管恫。     作為高度發展地區既香港,香港人既塑膠使用量同樣驚人。根據環保署最新資料,係2014年香港棄置既固體廢棄物當中至少20%係塑膠,重量竟然有成2,700噸,仲要係每一日!!!乘番一年365日,香港人每年dump左接近100萬噸既塑膠,創9年新高,但係回收率只佔全部回收廢物總量既0.05%左右,真係無眼睇。 睇下隔離既台灣,台北及台南政府部門同學校已經分別係今年及2006年起禁用即棄餐具,但香港到以依家仲未有法例規管。而環保署數據進一步顯示,2014年香港每日平均有43噸塑膠餐具被送去堆填區棄置,考慮到衛生問題,呢堆垃圾無可能會被回收,所以只會係堆填區下面發臭。     雖然香港政府近年亦都打算管制塑膠既應用,推出膠袋稅就係其中一個好例子,不過成效仍然有待定論。另一方面,就算香港政府有意進一步收緊對塑膠餐具既使用亦都會面臨飲食界(尤其是快餐店)既強烈反對,原因好簡單,使用生物降解既餐具成本比普通既貴好多,商家自然唔肯承擔。香港政府可以考慮係黎緊既一兩年進一步收緊對塑膠餐具既使用,例如向客人收取1蚊既餐具費迫使佢地自備餐具。不過管制塑膠應用任重而道遠,唔好話2020年,就算去到2030年香港都未必可以有效大幅減少塑膠既棄置量。

估唔到係香港備受好評既Uber竟然都會係日本無運行

估唔到係香港備受好評既Uber竟然都會係日本無運行

自從Uber係香港正式推之後成功搶走本地全職的士司機既生意,好多人依家已經慣左用Uber call的,原因不外乎係:   1、地點由你話事     唔少香港的士司機極度揀擇,尤其是凌晨時段更加係攞正牌做皇帝,黎到個陣先落窗問你去邊,然後就話「過海唔去」、「新界唔去」、「要交更唔去咁遠」,連行邊條隧道都可以由佢決定。一係就坐地起價,價錢通常係平時既兩倍左右,簡直視法例如無物!(拒載係犯法、唔跟咪錶收費同樣係違法,但係的士司機抗議個陣完全隻字不提) 結果就係一堆乘客好似去左街市咁企係度左問右問,真係好白痴。用Uber就唔同啦,司機一早知你要去既目的地,唔會係度阿吱阿咗。   2、司機態度比傳統的士好十萬倍     依家搭的士明明係消費者俾錢司機,但係的士司機既態度通常都係差差差。例如唔識路個陣就會叫你提早落車要你自己行過去、搭短途會串你點解唔搭巴士(鬼唔知巴士平咩?搭得的士就係想快呀嘛!)、過海入新界又會咦咦哦哦話難搵客出番黎,聽到都忟。有時無散紙俾張500紙仲有可能會俾司機鬧添!認真貼錢買難受。Uber司機會因為有評分系統,一旦被劣評就會無得撈,所以唔會亂黎,態度同服務都好,要傳統的士黎做咩?仲有,依家Uber 既車可以用credit card俾錢,無散紙係身都可以好方便,又係一個優點。   3、一大班人搭車唔洗再分車     依家啲的士一般都係4人位多,如果一大班人想搭的士就好鬼死麻煩,又要截到兩架的士之餘又要司機肯去同一個目的地,浪費時間之餘錢又俾多左。依家有左uber之後就可以call七人車一齊去,七個人夾錢既話車錢慳番唔少,又唔洗再蹝時間係度等到寂寞到夜深。     既然講到Uber有咁多優點,咁點解Uber係日本反而表現麻麻呢?好簡單,日本司機原本既服務就已經係超一流,上面提過既優點本身就有,Uber根本佔唔到優勢。 首先,日本的士幾乎統一加裝GPS導航,乘客要去咩地方,司機會先定好位再出發,乘客對路線一清二楚,自然就唔會有兜路既爭議。而係收費方面,日本的士堅持按錶收費,唔會坐地起價;仲有,日本的士已經可以用信用卡俾錢,之後仲會即刻印埋收據方便人claim錢添。     UBER之所以咁hit既原因,靠既就係成功解決的士佬「拒載」、「兜路」同「唔按錶收費」呢三大問題而成功突圍而出。但係由於日本管理制度已經好完善,所以上面既問題根本唔存在,UBER自然毫無長處可言。 唉,究竟香港的士司機幾時先可以有日本既一半水準?   封面圖片來源:danielfcamilo