Posts Tagged: 日本

來自日本嘅惡趣味--海洋溜冰場

來自日本嘅惡趣味--海洋溜冰場

講起溜冰場,大家通常都會覺得係齊娃娃齊齊玩既悶心地方,唔少屋企同埋情侶都會用黎作為約會同旅遊景點既選擇之一,之不過日本福岡知名既一個叫「太空世界(スペースワールド)」嘅遊樂園似乎令到好多遊客留下「難忘」既回憶。   「太空世界」遊樂園位於九州市,係今個月12號開始舉辦「冰之水族館」既主題布置,特別之處在於係塊冰下面鋪上大約5000隻既魚、貝類、蝦蟹等作為「背景」,原意係希望可以帶俾遊客置身於海洋中既感覺。但係結果由於大批人湧入搞到融冰,於是啲魚同貝類露左一部分、甚至整隻都露晒出黎,唔但整跌遊客,仲搞到啲魚被冰刀刮到出血,形成鮮血染紅冰層既恐怖畫面。     有人影低「屍橫遍野」既慘況,係放埋上網之後立即引黎大批網友喪插「核突」、「唔尊重生命」、「好浪費食物」等等既負評。眼見關公即將出動,園方係27號決定關閉溜冰場同向公眾道歉,根據園方解釋,埋入冰層中既秋刀魚、丁香魚、沙丁魚之類既魚,係漁民捕撈上岸個陣就已經死亡,而唔係外界所指係將活魚直接埋入,而鯨鯊呢啲大型魚係放大左既相,並唔係真魚。表示以「不當的呈現方式造成外界部分人士的不快,感到抱歉」,仲話會考慮為魚舉行悼念活動之後再以飼料或肥料方式處理。     但係日本既惡趣味點止得溜冰場咁簡單?一齊黎睇下其他惡趣味商品啦!      

依家日本興係寺院入面相睇?

依家日本興係寺院入面相睇?

相睇我諗大家都知係咩,由古代既「父母之命,媒妁之言」到三姑六婆親戚介紹再到早前興起既speed dating,相睇呢個形式都經歷左大大小小既變化。而係日本(其實都包括香港呢啲高度發達既亞洲地區),要搵合適既對象結婚似乎變得越黎越難,「獵婚」呢一類詞語亦都應運而生。所謂「獵婚」就係指啲人通過提供一條龍服務既「婚姻獵頭公司」(其實即係高級版既婚姻介紹所)去負責徵集同篩選對象、安排約會。呢啲人通常都係年紀大、高收入但生活好忙/社交圈子窄,所以需要呢啲公司幫佢地搞。當然呢啲公司既收費都係比較貴啦。     晚婚、難婚已經成爲日本(就黎殺到香港)一大社會問題。根據日本國家人口與社會安全研究所係2015年既調查顯示,係18歲至34歲間既單身人士入面,有七成男性與六成女性話自己無穩定既男女朋友;接近90%既受訪者話想結婚。而另一組數據顯示,係1970年,到50歲時從未結過婚既男性占同齡男性既1.7%,女性占同齡女性既3.3%;去到2010年,呢個比例分別去到20.1%同10.6%。呢間研究所仲預計,隨住炒散、收入唔穩定既人數不斷上升,黎緊2035年,呢個比例將會進一步攀升到29%同19.2%。可以睇到日本依家拍拖結婚既人越黎越少。     某啲單身男女係多次相親失敗後,開始嘗試去到寺院入面相睇。有黎相睇既人話婚姻介紹所收取既費用一般係50萬日元以上(大約3萬7千幾蚊港紙),實在太貴負擔唔起。而係寺院相睇就平勁多,每次費用只須3000日元(大約220幾蚊港紙)。除左價錢之外,選擇到寺院相睇既人仲有其他原因。     其中一名女性覺得「誠實既人會黎寺院相睇」。佢話wor,因爲之前有一友係相睇網站上面被人呃過,所以自己已經對網上相睇無晒信心。《獵婚難民》既作者話,係其他相睇場合,啲人通常淨係關睇樣、年紀同埋收入,對於個啲30歲以上、已經受夠這呢種相睇模式的既人黎講,寺院相睇形式新穎,燃起佢地既新希望。再加上寺院氣氛相對莊嚴清肅,黎得相睇既人自然覺得其他人都係因為受夠傳統相睇、想返樸歸真簡單誠實所以先黎,根據著名既law of attraction理論,大家既共同點自然多左,感覺應該更加夾。   老老實實,依家日本人面對既問題香港好快都要面對。唔同既係,女性係香港既地位更加崇高,性格亦更加獨立,要求自然更高,未婚事業女性人數唔洗諗肯定高到傻。到時唔知又會流行咩模式既相睇活動呢?   封面圖片來源:imrexecutive.com

估唔到係香港備受好評既Uber竟然都會係日本無運行

估唔到係香港備受好評既Uber竟然都會係日本無運行

自從Uber係香港正式推之後成功搶走本地全職的士司機既生意,好多人依家已經慣左用Uber call的,原因不外乎係:   1、地點由你話事     唔少香港的士司機極度揀擇,尤其是凌晨時段更加係攞正牌做皇帝,黎到個陣先落窗問你去邊,然後就話「過海唔去」、「新界唔去」、「要交更唔去咁遠」,連行邊條隧道都可以由佢決定。一係就坐地起價,價錢通常係平時既兩倍左右,簡直視法例如無物!(拒載係犯法、唔跟咪錶收費同樣係違法,但係的士司機抗議個陣完全隻字不提) 結果就係一堆乘客好似去左街市咁企係度左問右問,真係好白痴。用Uber就唔同啦,司機一早知你要去既目的地,唔會係度阿吱阿咗。   2、司機態度比傳統的士好十萬倍     依家搭的士明明係消費者俾錢司機,但係的士司機既態度通常都係差差差。例如唔識路個陣就會叫你提早落車要你自己行過去、搭短途會串你點解唔搭巴士(鬼唔知巴士平咩?搭得的士就係想快呀嘛!)、過海入新界又會咦咦哦哦話難搵客出番黎,聽到都忟。有時無散紙俾張500紙仲有可能會俾司機鬧添!認真貼錢買難受。Uber司機會因為有評分系統,一旦被劣評就會無得撈,所以唔會亂黎,態度同服務都好,要傳統的士黎做咩?仲有,依家Uber 既車可以用credit card俾錢,無散紙係身都可以好方便,又係一個優點。   3、一大班人搭車唔洗再分車     依家啲的士一般都係4人位多,如果一大班人想搭的士就好鬼死麻煩,又要截到兩架的士之餘又要司機肯去同一個目的地,浪費時間之餘錢又俾多左。依家有左uber之後就可以call七人車一齊去,七個人夾錢既話車錢慳番唔少,又唔洗再蹝時間係度等到寂寞到夜深。     既然講到Uber有咁多優點,咁點解Uber係日本反而表現麻麻呢?好簡單,日本司機原本既服務就已經係超一流,上面提過既優點本身就有,Uber根本佔唔到優勢。 首先,日本的士幾乎統一加裝GPS導航,乘客要去咩地方,司機會先定好位再出發,乘客對路線一清二楚,自然就唔會有兜路既爭議。而係收費方面,日本的士堅持按錶收費,唔會坐地起價;仲有,日本的士已經可以用信用卡俾錢,之後仲會即刻印埋收據方便人claim錢添。     UBER之所以咁hit既原因,靠既就係成功解決的士佬「拒載」、「兜路」同「唔按錶收費」呢三大問題而成功突圍而出。但係由於日本管理制度已經好完善,所以上面既問題根本唔存在,UBER自然毫無長處可言。 唉,究竟香港的士司機幾時先可以有日本既一半水準?   封面圖片來源:danielfcamilo