Posts Categorized: Pokemon Uranium

Pokemon Uranium 試玩心得 (二)

Pokemon Uranium 試玩心得 (二)

Pokemon Uranium自從玩到去第二個GYM之後變到好忙於是就hold住左隻game無玩。上個星期五忙完之後就開始接力繼續玩落去。依家同大家分享下隻game既流程/劇情走向。     另外我成功將火主進化(lv29),兼捉埋隻惡+格鬥系既羊咩咩升到lv22再第一次進化,方便將來對付超能力同鬼系,佢既特性都好屈機,每打低一隻精靈物攻升一級,對於打天王/GYM Leader黎講好重要,因為可以方便到時一隻清晒。       同主角父母好熟既工程師打算係十年前出事既核電廠原址重新建設一個全新既核電廠。佢邀請左主角同佢自己個仔Theo(亦係主角既對手)黎到核電廠所在島嶼。係咁意提左一下當年發生既事,佢覺得主角既老豆無原諒佢,因為佢當時無成功救主角阿媽出去。跟住主角去到當年阿媽消失既核電廠調查,由殘缺不全既檔案碎片入面得知佢當時似乎進行緊一個神秘研究。       雖然事故發生左已經十年,輻射已經清理得七七八八,但係附近既精靈因為長期受到核輻射污染外形出現變異,而且會主動攻擊人類,即使成功用精靈球捕捉佢地,佢地亦唔一定會聽訓練員話甚至攻擊埋訓練員。     鈾屬性係呢隻Game既獨有屬性,鈾屬性仲有專屬鈾屬性技能,例如 Gamma Ray(伽瑪射線)同 Radioacid(輻射酸液)等等,除左鋼系之外對其他所有屬性精靈造成雙倍傷害(如果係雙重非鋼系屬性就會變成恐怖既四倍傷害),但同時其他屬性技能亦都會對鈾屬性精靈造成雙倍傷害。值得注意既係,如果玩家既精靈長期逗留係核輻射地區又或者長期接觸鈾屬性精靈就有機會受到輻射影響變埋鈾屬性。               完左之後就向第五個道館出發,衍生出黎核輻射問題交俾主角老豆同佢既保衛團隊繼續處理。玩到呢度覺得隻Game既精靈通常擁有雙重屬性,但係弱點亦都會極之明顯(某個相剋屬性可以對佢造成四倍傷害)。鈾屬性好特別,屬於互相傷害類型,而且自己既精靈都有可以被影響。等級方面一般唔洗太擔心,只要你有打齊路人+善用俾你既幸運蛋(作用係獲得雙倍經驗極升LV/進化),道館對戰應該無乜難度。

被Nitendo強制下架既改版大作”Pokemon Uranium”試玩心得

被Nitendo強制下架既改版大作”Pokemon Uranium”試玩心得

正當大家都仲係度玩緊Pokemon GO係周圍走黎走去個陣,外國已經有死忠fans花費9年既時間製作出Pokemon既改版檔--Pokemon Uranium。點解要用9年?因為作者創作左超過 150 種原創小精靈,另外新增左全新既第19種「Nuclear」屬性。除左本身固有既Nuclear屬性精靈,如果係遊戲入面精靈長期接觸到輻射亦會變成Nuclear屬性。擁有Nuclear屬性既精靈會變得殘暴,有機會唔聽玩家指令。 呢款改版大作係公開之後即刻吸引到極多玩家下載。不過就係短短幾日內達成 150 萬下載次數之後,Pokemon Uranium 製作人就正式宣佈因為某啲「原因」移除左遊戲既download link。咁受歡迎既game點可以唔玩呀?梗係要親身試下係咩料啦!                 基本上玩左兩關之後都對呢隻game滿意,畫質出色、用心既地圖設計、原創精靈(另加少量原作精靈,例如伊貝系列)、難度適中既gym leader戰鬥,但係劇情方面就暫時並無著墨太多,只係知道主角父母原本係核電廠做,有一日核電廠突然發生故障,阿媽選擇左留係核電廠之後不知所蹤,阿爸逃出生天後大受打擊變成工作狂。事隔十幾年後同主角父母好熟既工程師打算重建當年事故核電廠,之後既劇情就唔知道了。我諗我會keep住玩,到時再分享俾大家。