Posts Categorized: 雜談

估唔到係香港備受好評既Uber竟然都會係日本無運行

估唔到係香港備受好評既Uber竟然都會係日本無運行

自從Uber係香港正式推之後成功搶走本地全職的士司機既生意,好多人依家已經慣左用Uber call的,原因不外乎係:   1、地點由你話事     唔少香港的士司機極度揀擇,尤其是凌晨時段更加係攞正牌做皇帝,黎到個陣先落窗問你去邊,然後就話「過海唔去」、「新界唔去」、「要交更唔去咁遠」,連行邊條隧道都可以由佢決定。一係就坐地起價,價錢通常係平時既兩倍左右,簡直視法例如無物!(拒載係犯法、唔跟咪錶收費同樣係違法,但係的士司機抗議個陣完全隻字不提) 結果就係一堆乘客好似去左街市咁企係度左問右問,真係好白痴。用Uber就唔同啦,司機一早知你要去既目的地,唔會係度阿吱阿咗。   2、司機態度比傳統的士好十萬倍     依家搭的士明明係消費者俾錢司機,但係的士司機既態度通常都係差差差。例如唔識路個陣就會叫你提早落車要你自己行過去、搭短途會串你點解唔搭巴士(鬼唔知巴士平咩?搭得的士就係想快呀嘛!)、過海入新界又會咦咦哦哦話難搵客出番黎,聽到都忟。有時無散紙俾張500紙仲有可能會俾司機鬧添!認真貼錢買難受。Uber司機會因為有評分系統,一旦被劣評就會無得撈,所以唔會亂黎,態度同服務都好,要傳統的士黎做咩?仲有,依家Uber 既車可以用credit card俾錢,無散紙係身都可以好方便,又係一個優點。   3、一大班人搭車唔洗再分車     依家啲的士一般都係4人位多,如果一大班人想搭的士就好鬼死麻煩,又要截到兩架的士之餘又要司機肯去同一個目的地,浪費時間之餘錢又俾多左。依家有左uber之後就可以call七人車一齊去,七個人夾錢既話車錢慳番唔少,又唔洗再蹝時間係度等到寂寞到夜深。     既然講到Uber有咁多優點,咁點解Uber係日本反而表現麻麻呢?好簡單,日本司機原本既服務就已經係超一流,上面提過既優點本身就有,Uber根本佔唔到優勢。 首先,日本的士幾乎統一加裝GPS導航,乘客要去咩地方,司機會先定好位再出發,乘客對路線一清二楚,自然就唔會有兜路既爭議。而係收費方面,日本的士堅持按錶收費,唔會坐地起價;仲有,日本的士已經可以用信用卡俾錢,之後仲會即刻印埋收據方便人claim錢添。     UBER之所以咁hit既原因,靠既就係成功解決的士佬「拒載」、「兜路」同「唔按錶收費」呢三大問題而成功突圍而出。但係由於日本管理制度已經好完善,所以上面既問題根本唔存在,UBER自然毫無長處可言。 唉,究竟香港的士司機幾時先可以有日本既一半水準?   封面圖片來源:danielfcamilo

贏左起跑線係永恆不變既真理?

贏左起跑線係永恆不變既真理?

睇左TheAtlantic 月刊既一篇 “Poor at 20, Poor for Life” (「20歲窮,窮一生」)文章,引述一份有關美國係1981年至2008年期間打工一族收入同社會流動性既研究報告,指出左三個重點結果:第一,美國社會收入分配既流動性顯著降低,同以前相比由中產階層上到高收入階層既可能性減少左20%;第二,如果美國打工仔第一份工既人工比較低,就算係十幾年後佢地既收入都唔會高得去邊;第三,收入變化趨勢同打工仔既受教育程度無關。   咁香港又點呢?我覺得上面幾個point完全適用囉。    1、收入分配既流動性顯著降低同十幾年後既收入分別     2015年立法會秘書處資料研究組既「香港的社會流動」研究簡報引述港大研究報告,接近63%既打工仔本地工人係做左5年野之後既收入仍然停留係同一個收入階層,而47%本地工人係做左10年野之後既收入仍然停留係同一個收入階層。姐係話大約只有16%既人可以用5至10年既時間上位。睇完你都咪話唔心up。   2、收入變化趨勢同受教育程度無關-香港既大學生人工不停眨值,跑輸通漲     依家既大學生愈黎愈多,asso讀上去又得、top up又得、私立大學出黎既大把,「天之驕子」既concept係呢個年代已經完全破滅。競爭大人又多,學歷自然唔值錢,相比起以前,人工唔單止無高仲越黎越低,但物價就...     有人亦都係討論區出post呼籲大學生開高啲價,唔好做爛個市,如果唔係只會造成惡性循環,越做越低賤。       係全球化既影響之下,大家一樣咁濕滯。依家啲怪獸家長成日俾人插話虐待仔女,但係依家睇黎「贏左起跑線上」(依家應該要領先到「贏在射精前」)似乎先係真理。  

呢個blog係咩黎架?

呢個blog係咩黎架?

個網名叫得give/me/a/break,自然係娛樂取向既blog啦。 其實呢個blog係用黎分享自己既生活點滴、時事、personal opinion、hot topic咁。至於點解唔係FB搞?因為好驚講錯野俾人網絡審判,想搵個private少少既地方share,順手學下寫文。 個blog將就住下睇住先,岩岩開始用wordpress整blog好麻煩,又唔多熟,遲d得閒先慢慢再整靚仔佢。