Posts Categorized: 雜談

童年回憶會唔會又少一個?

童年回憶會唔會又少一個?

「玩具反斗城,益智開心天地,多多新意樣樣有齊全合意……」或者你細細個都已經睇過呢個廣告,就算無睇過都無可能唔知呢間野啦掛!?仲係細細個陣講起買玩具嘅地方,除左樓下啲雜貨店,如果想買高質玩具嘅話,就一定要去 Toys“R”Us 。當然依家買玩具嘅地方選擇已經多左好多,大把樓上舖又平又靚,買玩具都已經唔會再去玩具反斗城lu。不過對好多80後90後黎講,「玩具反斗城」代表嘅自然亦係童年回憶之一,地位自然唔一樣。 可惜好景不長,前幾日玩具反斗城係美國官網正式宣佈,就集團、以及集團係美國同加拿大子公司嘅業務向美國弗吉尼亞州法院申請破產保護。集團係美加國家以外嘅業務,包括約255間特許經營店就唔係破產保護範圍之內。唔講唔知,截至今年四月底為止,玩具反斗城已經負債49億美元,黎緊係一八及一九年仲分別要償還4億同17億美元嘅債務添。 同大家講下歷史,玩具反斗城由當時得25歲嘅 Charles Lazarus 係 1948 年創立,前身係一間美國華盛頓叫「Children’s Supermart」嘅幼兒家具店,專賣嬰兒車、奶樽。之後美國踏入戰後嬰兒潮,Charles睇準商機,將玩具引入店內,第一件玩具 cradle gym(訓練嬰兒手力的健身墊),銷量爆燈令 Charles 信心爆棚,引入埋三輪車、圖書同其他玩具,將店舖轉型做玩具舖。 守業10年後,Charles 正式將店舖改名「Toy’R’Us」,採取超級市場嘅經營模式,俾客人自己係貨架拎貨,然後到收銀處俾錢,將品牌定位成美國最大型連鎖玩具店,仲將商標嘅’R’字母左右調轉,呢個舉動雖然被當時嘅家長、老師指文法錯誤,但佢本人覺得咁做會令商標更吸引,而且啲細路初初學寫「R」字母個陣會經常將字母調轉寫,可以引起佢地嘅共鳴。 八十年代係玩具反斗城最風光嘅時代,當時公司不斷拓展海外市場,1984年係加拿大開設第一間專門店。美國前總統喬治布殊仲親身飛到日本,為玩具反斗城係日本嘅第一個據點主持開幕剪綵,風頭一時無兩。係2001年公司仲係美國紐約地標時代廣場開埋佔地大約11萬平方呎嘅旗艦店,但舖頭係2015年底關門大吉,之後再無聽到要開旗艦店嘅計劃。睇番資料,目前玩具反斗城在美國境內有885間店舖,海外市場則有810多間,以及超過255間特許經營店(當中包括本港12間由利豐母公司馮氏集團經營)。目前公司係內地大展拳腳,內地經營135家間舖,亦都會在未來幾個禮拜開多22家新舖。玩具反斗城亞洲依家係大中華區同東南亞市場有成226間店舖,連同之前合併嘅161家日本店舖,玩具反斗城係泛亞洲區嘅分店數目竟然有成387間咁多!不過係香港嘅表現就。。。 有業內人士分析,美國玩具反斗城作為廉價嘅大型玩具連鎖店,雖然之前已淘汰好多獨立玩具兼吞併埋多競爭對手,但其實佢同其他大型連鎖店一樣,既要面對沃爾瑪、Target等折扣店嘅挑戰,又要面對亞馬遜呢啲大型網購平台嘅競爭,真係唔似表面咁風光。呢個基本上係所有零售業務要面對嘅窘境。而且為左促銷,佢向《星戰》嘅玩具許可同 Lego 電影注入大量投資,但未收預期效果,白白浪費金錢。除左呢D因素之外,依家越黎越多嘅父母都選擇用「電子奶嘴」令佢地開心,玩具嘅作用同地位亦因為咁變得越黎越低微,市場需求減少,玩具行業要面對嘅環境只會越趨嚴峻,真心唔好做。 封面圖片來源:says.com

今屆個港姐冠軍…好一般 wor

今屆個港姐冠軍…好一般 wor

香港小姐2017終於落幕,雖然我完全唔知星期日個日原來已經係總決賽。證明左今年嘅港姐話題性欠奉,亦都引唔起太大關注。不過係賽果公布之後反而成為近日熱門話題,講緊就係節目最後階段,當觀眾係網上公投選出心目中嘅冠軍人馬之後,再由評判逐一公布心儀人選。結果發現雷莊𠒇同何依婷以4:4打和,然後 DoDo 姐以「校長」身份投出決定性一票令到雷莊𠒇以五比四反超前何依婷贏得寶座。   呢一個結果即時被網民鬧爆,覺得過程極之兒戲,而且亦都無乜說服力可言,話今屆港姐選舉改名做「Do 姐選港姐」、「TVB小姐」先岩。而且亦都有網民指出,雷莊𠒇樣貌同其他港姐相比唔夠突出、中文唔好,根本無資格代表香港。言論一向毒辣嘅網上KOL King Jer 亦都覺得「冠軍真係無香港小姐feel,完全無東方美,似菲律賓/泰國小姐多啲,啲中文又差,其實好難代表到香港。」通訊事務管理局仲收到20宗投訴,主要投訴內容賽果不公、黑箱作業、有誤導觀眾及有植入式廣告之嫌;無綫方面亦收到9宗投訴,表示唔滿意賽果。成件事演變成一場小型公關災難。   另外,亦都有網民記者對呢位港姐冠軍大起底,發現佢老豆原來大有來頭,係香港十大傑出設計師、人稱「設計多面手」嘅雷葆文,身家有傳過億,係香港同海外都擁有物業,仲係世界商貿協會(WTC)嘅特別顧問,強大嘅父幹後台自然令人更加懷疑呢個選舉係咪造馬。係選舉結果出爐之後,大批網民仲由討論區移師到佢嘅Instagram直接追擊。網民批評佢外表樣貌似賓賓,唔識中文廣東話,回流香港代表性又唔夠,「不如唔好叫Miss Hong Kong,叫Miss TVB好過」之類。   面對網民一面倒嘅劣評,雷莊𠒇係當選第二日就即時係IG上面開live,大方「回應」網民對自己嘅質疑。佢話知道外間有好多人都唔撐佢拎冠軍,會尊重唔同人嘅意見:「不過講真,其實我唔係好Care(負評),一個人係要愛自己,我就知道自己價值喺邊。」之後佢又提到有富爸爸嘅報道,佢又大插網友可能唔係太聰明,竟然會相信媒體嘅報道。又話:「…你哋唔滿意呢個賽果嘅人,唔通你想我放棄個后冠?我依家唔會咁做囉,我只會花時間去理我嘅支持者,我唔係要全部人都鍾意我,如果係咁我都好冇自信啫…之後我會繼續做自己,我唔會改變去討好其他人!」 呢個回應自然進一步激起網民嘅反彈,指責佢唔單止外表普通,EQ更加唔好,同前港姐冠軍張嘉兒當時面對大量劣評嘅回應天差地別,連登討論區對佢口誅筆伐,報紙似乎亦都無特別幫佢講好說話,如果雷莊𠒇繼續「做自己」,恐怕將會俾香港網民排擠。 封面圖片來源:圖片來源:晴報

759 阿信屋條路應該點行落去?

759 阿信屋條路應該點行落去?

759 阿信屋你同我都梗有一間係附近。自從係 2010 年正式開業以黎,用左唔洗3年分店數目出現「爆炸式」增長,由無名小卒成為大佬。根據公司嘅年報資料,2011年阿信屋分店得11間,而係短短一年時間,即係 2012 年分店數目激增超過5倍到71間,老細林偉駿當時仲話要以120間公店作為目標。而係兩年後,分店數目翻左個 double 到192間,其實經已達標,但阿信屋擴張的「欲望」沒有因此而停止,2015年再下一城直逼250間。 除左零食之外,759 阿信屋仲經營唔同主題嘅專賣店,包括28間KAWAIILAND、16間超級市場、10間急凍食品市場、3間759車仔麵、3間759 SKYLAND、3間759麵包工房、2間759雲吞麵、2間759茶餐廳、1間759寢具屋、1間759 KAGUYA、1間759 TOYSLAND、1間家品市場同1間759 飯堂,種類多到 O 晒嘴。可惜,盲目擴張導致開得太多舖,部份更加捱貴租,係舊年12月759阿信屋母公司CEC國際公佈嘅業績由盈轉虧,蝕左成2,993萬元,而係2015年同期就賺809萬元,差別極大。 雖然老細林偉駿即時採取各種策略止蝕,包括汁左唔少鋪頭,但依然逃避唔到蝕錢嘅命運。根據今年7月尾公佈嘅中期業績內容,「在零售市道低迷兼行業競爭激烈情況下總收益首次錄得倒退,為2,150,614,000港元(2016年:2,458,839,000港元),較去年度下跌12.5%。本年度之綜合毛利隨收益亦告下跌,為731,848,000港元(2016年:821,425,000港元),較去年同期下跌10.9%。」除左收益下降之外,「即使勞務及行政成本能得以調整受到控制,依然未能平衡本年度之總收益及綜合毛利之下降,使本年度錄得綜合虧損49,993,000港元(2016年:29,715,000港元)。 」 阿信屋近年其中一個最令人失望嘅地方係來自日本嘅高質貨品越來越少。阿信屋係2010年7月創立個陣參照日本消費模式、銷售日本零食、飲品、副食品同其他包裝食品,形象相對鮮明。但係阿信屋嘅日本貨係2014年只佔公司零售業務55%,去到2015年進一步跌至42.1%,而根據最新的數字,更跌到只有39%。貨品來源越黎越雜自然對品牌形象不利,尤其係內地貨比例越黎越高個陣。     除左呢個之外,亦有網友分享話佢身邊有唔少朋友發現阿信屋貨物供應好唔穩定,例如朋友鐘意食某隻薯片,買左幾包番屋企吃之後過多幾星期食完想再買番個陣就發現無貨不特止,連店鋪入面個擺位都變埋。一次兩次之後,個人就好少會再走入去東搵西搵,最後又回歸到「卡樂B」懷抱。 作為一間可以便利度同價錢都媲美超市同7仔嘅零食鋪+雜貨鋪,我都唔希望佢執粒,如果佢再唔好好改善個經營模式,睇怕黎緊嘅日子同業績報告都唔好睇得去邊。 封面圖片來源:蘋果日報

香港最新搵食大熱職業-動物傳心師

香港最新搵食大熱職業-動物傳心師

靈媒、問米婆呢啲特殊職業你就一定聽過,但係「動物傳心師」你又聽過未?呢幾日網上最 hit 嘅話題莫過於係動物傳心師呢個話題。話說一向以高汁為名嘅有線「新聞刺針」係尋日自己個 FB Page 上載左【動物傳心得唔得?】嘅新聞短片,話「看見近年坊間興起動物傳心熱,有動物傳心師說靠動物照片,能運用量子物理學或者腦電波,就能讀到相中動物的所思所感。記者於是找來幾位傳心師一試,結果如何?」     係片段入面,記者為左測試坊間有D知名度嘅動物傳心師,特登係淘寶買左個假嘅龜番黎再影相,然後同5個唔同收費嘅動物傳心師「求助」,而問題係「點解佢要離家出走」。而五個動物傳心師最後分別俾出唔同版本嘅「答案」,令人啼笑皆非。     最好笑嘅莫過於係當五個動物傳心師知道左隻龜係假嘅時候,反應都唔一致,有D又話係因為你唔信所以個寵物無儲存到個意識、有啲又話可能係連接左其他同名嘅龜身上面 (但你明明有相架wor)、仲有個直接 cut 線,真係無眼睇呀!     節目亦都搵黎坊間出名嘅動物傳心術課程培訓機構 ISAC (Institute of Scientific Animal Communication) 創辦人 Thomas 黎做左訪問,佢仲表示唔可能發生,應該係動物傳心師嘅自言自語。節目出左街之後,隨即引黎大批網民討論,話呢D所謂嘅「動物傳心師」根本就係騙子,連分辦真假都做唔到,其他野更加係唔可信。而且呢一項服務收費唔平,段鐘/每個問題計,由140蚊至400蚊不等,真係唔慌唔易搵錢。而呢個 Thomas 更加有舉辦收費課程,就咁睇呢行可以話係無本生利,豬籠入水話咁易啦。     呢一行其實本質上就同靈媒、問米婆一樣,孰真孰假、有料無料真係要自己親身去試先知。之前壹週刊都有做過測試,有一個叫 Yuki 嘅動物傳心師成功講到D野出黎,亦都成功分辦相入面嘅動物仲在唔在世。至於堅定流,就真係要你親身試驗先知啦。 封面圖片來源:Crystal Inner Circle

係香港打機會有出頭嘅一日咩?

係香港打機會有出頭嘅一日咩?

係細個個陣,大家都應該有一段時間(甚至到依家都係)沉迷打機,由以前90年代嘅 Gameboy Color、再到2000年初嘅 Online Game、再到2000年尾嘅信長、LOL、DOTA、再到依家興起嘅手機遊戲,遊戲行業其實經歷左唔少嘅大起大落。仲記唔記得每次打打下機俾阿媽見到都會被佢話咩「打機有咩用呀?仲唔溫書!?」、「打機叻咁又點?搵到食咩?」之類嘅說話。係老一輩心目中,打機即係無用、無出息嘅同義詞。     不過自從 LOL 出現,熱浪席捲全球,仲淘汰埋以往大熱嘅星際爭霸、DOTA 同信長呢啲同類型即時競技遊戲之後,電子競技行業正式崛起,而電競呢一個新詞彙、新行業亦都開始正式呈現係大家嘅眼前。但係你又知唔知呢一行究竟發展成點?潛力又可以有幾大呢?黎自荷蘭市場研究組織 Newzoo 發表嘅最新一份報告中指出,全球電競經濟產值將會係 2017 年達到 6.96 億美元,係黎緊 2020 年更加會 Double Up 達到15億美元,足以令人關注。     究竟電競點解會咁賺錢?錢從何來呢?首先要了解嘅係一啲熱門即時對戰類遊戲,例如 LOL、DOTA 呢啲遊戲廠商每年都會舉辦幾次大型公開職業比賽賽事,吸引唔少玩家入場睇比賽之餘,同時都會誘使玩家進行消費(例如買飛入場、買下紀念品),同時唔少相關品牌(例如電腦廠商、周邊配件廠商) 亦都會藉機贊助賽事做埋 marketing,係呢個時候成個電競產業就已經同其他體育賽事性質相差無幾。所以,唔怪得亞洲奧林匹克理事會正式宣布將電競列為 2022 年嘅杭州亞運正式比賽項目之一。     根據 Newzoo 個份報告,佢預計有關廠商品牌將會係呢個行業花費5.17億美元,其中1.55億美元係廣告,2.66億美元係贊助,仲有9500萬美元係媒體版權(用黎轉播賽事),而今年消費者係門票同商品方面嘅支出將達到6300萬美元,淨低嘅1.16億美元係遊戲發行商投入到電競市場嘅總投資。其實對於大多數遊戲發行商黎講,電競目前唔算係有利可圖嘅業務。之不過如果考慮埋對遊戲收入嘅積極影響,同未來將電競作為獨立業務嘅發展潛力黎講,他們嘅投資都叫合理。     隨住電競產業逐漸成熟,電競選手的收入同身價一樣水漲船高。Newzoo 估計全球電競觀眾將係 2017 年達到 3.85 億人次,主要由 1.91 億位「常性觀眾」(即係fans) 同另外 1.94 億「偶爾觀眾」(得閒睇下比賽嘅人)組成。而預計到 2020 年,常性觀眾嘅數量更將增加 50%,達到 2.86 億人。隨著觀眾人數增加,比賽獎金亦越黎越豐厚,根據 WIKI 資料,LOL… Read more

英國唔可以再快樂學數學?

英國唔可以再快樂學數學?

外國既學習風氣一向都好自由好輕鬆,係唔少香港學生既理想學習地。不過之前睇到台灣中時電子報既報道,話原來歐美國家既中小學生竟然唔強迫仍佢地學乘法口訣,考試太過依賴計數機導致基礎運算能力不足。相比之下大陸上海中學生既數學能力傑出,係2012年國際學生能力評量計劃(簡稱PISA)入面既數學測驗獲得全球冠軍。係個次PISA計劃打入前10強既歐美國家分別係列支敦士登、瑞士同荷蘭,英美兩大強國唔單止入唔到10強,令人大跌眼鏡既係,英國中學生既PISA數學成績仲落後上海中學生3年咁多!     搵番BBC既報道,今次排名入面亞洲國家同地區包辦頭五名幾乎威盡國際,依次序係上海、香港、新加坡、日本同韓國。一向被視為教育產業大國既英國與美國分別排第二十名同第二十八名,鬥唔過排名第十二位既越南,而非洲既加納就包尾。OECD話,如果英國可以減低有關數字,可以為英國經濟帶黎成萬億既經濟回報咁話wor。     結果,英國教育部dump左4100萬英鎊引入「上海教學模式」,將來會俾英國半數以上、大約8000所中小學採用,目前已經英國有70幾個小學老師去上海師範大學接受培訓,之後仲會直接走入上海43間小學教室,親身觀摩上海數學老師係點教數學。     根據呢套「上海教學模式」,每一堂既設計都只圍繞單獨一個數學概念,無論係最基本既加法定係對等式或分數的理解,只要有一個學生掌握唔到呢個概念,老師就唔會講新既內容。咁做既目的係保證重要既概念會課堂上完全被學生掌握,將來就唔洗再講多次。有批評意見認為個啲數學拔尖既學生會覺得無聊,學習積極性受到打擊。 重複強調概念係上海數學教育既一個基本要素。孩子們由5歲開始就通過不斷重複黎掌握每一個基礎概念。一個學生回答老師既問題之後,其他學生一齊重複同樣答案。另一個學生回答另一個問題,全體學生再一起重複同樣答案。 Sheffield Hallam University 發表對上海教學模式既評估報告,指出老師每天只須教兩堂每堂40分鍾既課,其他時間都用黎提高教學質素,包括同行feedback同聽課觀摩。更重要既係,上海數學教師係任職前要上五年大學,期間要專修一科小學數學教育既課程。即係話師資同備課都備受重視。   基礎既數學能力係要既,但係一味死記硬背就真係有用?尤其是兩者文化完全唔同,一味照辦煮碗未必行得通。係亞洲地區依家高叫「愉快學習」既年代下,西方教育反過黎學番中式教育,實在諷刺。 封面圖片來源:阿波羅新聞網

唔加價可以點?偷工減料囉!

唔加價可以點?偷工減料囉!

唔知點解,啲大集團年年都大條道理話經濟差,但係又唔知點解年年都賺錢兼加價wor,最閉翳既係我地啲人工又唔見有加呢!!當然啦,加價對消費者黎講點都唔會係一件好消息,對佢地心理影響唔可以睇小。早幾日喺英國賣嘅瑞士三角朱古力縮水事件就引起左唔少朱古力迷既哄動,生產商就回應話係因應生產成本上漲(又係同一個原因lol),但公司又唔希望加價,所以「唯有」將就一下,改改個朱古力模,加大條罅等大家可以以同樣價錢買到「同樣size」(但唔同重量)嘅嘢食。根據官方資料,原先400克既版本將會變成360克(少左10%),而170克就減到得番150克(少左11.8%),即係變相至少加價10%。而新款包裝近期開始陸續流出市面。     正所謂「騙徒既手法層出不窮」,為咗避免加價觸動到消費者既神經,其實唔少牌子都曾經偷偷改動過包裝節省成本,以下係佢地既常見手法:     1、獨立包裝法 (餅乾類最常見) 無錯,獨立包裝可以確保食物新鮮同衞生,儲存亦都更加方便。不過,獨立包裝會佔據原先擺放食物既空間,有啲品牌仲會係獨立包裝注入空氣整大個包裝令體積膨脹。雖然係消費者眼中個包裝盒依然不變,但實際上食物既份量已經減少。呢招相當高明,表面上好似方便左消費者但實際上又可以慳成本,一舉兩得。     2、靜雞雞咁縮水 (飲品零食常見招數) 有關呢方面討論得最多嘅都莫過於「減肥成功」既品客薯片,由於圓桶包裝直徑細咗兼每片薯片都細片埋,薯片份量成功由134克「減磅」至110克,變相加價大約18%。同樣咁係2008年可口可樂都曾經使出呢招絕技,將每罐 355ml 既可樂、雪碧、芬達同玉泉汽水減到330ml,變相加價7%。當時連可樂鋁罐都變矮左少少,除非係忠實 fans,如果唔係普通消費者驟眼睇根本唔覺有咩分別。     3、多餘包裝(朱古力、餅乾同零食類常見) 廠商會將食品「包上包」,同埋用硬卡墊高、分隔呢啲方法務求增加包裝佔據既空位,睇番《明報》今年1月有關賀年禮盒比較既報導,瑞士三角朱古力禮盒(哈,再次成功中槍)入面既三角立方體紙托佔左禮盒成75%既空間,擺放朱古力既空間得個25%。而瑞士糖裝禮盒亦都同樣咁以上闊下窄既圓錐形膠盤托住啲糖,全盒得中間三成空間真係用黎裝住啲糖。     唉,總之我地呢啲基層只能繼續捱落去啦。經濟好就加價兼縮水,經濟唔好又大條道理咁cut人工同埋炒人,真係龍門任佢地搬。  

依家日本興係寺院入面相睇?

依家日本興係寺院入面相睇?

相睇我諗大家都知係咩,由古代既「父母之命,媒妁之言」到三姑六婆親戚介紹再到早前興起既speed dating,相睇呢個形式都經歷左大大小小既變化。而係日本(其實都包括香港呢啲高度發達既亞洲地區),要搵合適既對象結婚似乎變得越黎越難,「獵婚」呢一類詞語亦都應運而生。所謂「獵婚」就係指啲人通過提供一條龍服務既「婚姻獵頭公司」(其實即係高級版既婚姻介紹所)去負責徵集同篩選對象、安排約會。呢啲人通常都係年紀大、高收入但生活好忙/社交圈子窄,所以需要呢啲公司幫佢地搞。當然呢啲公司既收費都係比較貴啦。     晚婚、難婚已經成爲日本(就黎殺到香港)一大社會問題。根據日本國家人口與社會安全研究所係2015年既調查顯示,係18歲至34歲間既單身人士入面,有七成男性與六成女性話自己無穩定既男女朋友;接近90%既受訪者話想結婚。而另一組數據顯示,係1970年,到50歲時從未結過婚既男性占同齡男性既1.7%,女性占同齡女性既3.3%;去到2010年,呢個比例分別去到20.1%同10.6%。呢間研究所仲預計,隨住炒散、收入唔穩定既人數不斷上升,黎緊2035年,呢個比例將會進一步攀升到29%同19.2%。可以睇到日本依家拍拖結婚既人越黎越少。     某啲單身男女係多次相親失敗後,開始嘗試去到寺院入面相睇。有黎相睇既人話婚姻介紹所收取既費用一般係50萬日元以上(大約3萬7千幾蚊港紙),實在太貴負擔唔起。而係寺院相睇就平勁多,每次費用只須3000日元(大約220幾蚊港紙)。除左價錢之外,選擇到寺院相睇既人仲有其他原因。     其中一名女性覺得「誠實既人會黎寺院相睇」。佢話wor,因爲之前有一友係相睇網站上面被人呃過,所以自己已經對網上相睇無晒信心。《獵婚難民》既作者話,係其他相睇場合,啲人通常淨係關睇樣、年紀同埋收入,對於個啲30歲以上、已經受夠這呢種相睇模式的既人黎講,寺院相睇形式新穎,燃起佢地既新希望。再加上寺院氣氛相對莊嚴清肅,黎得相睇既人自然覺得其他人都係因為受夠傳統相睇、想返樸歸真簡單誠實所以先黎,根據著名既law of attraction理論,大家既共同點自然多左,感覺應該更加夾。   老老實實,依家日本人面對既問題香港好快都要面對。唔同既係,女性係香港既地位更加崇高,性格亦更加獨立,要求自然更高,未婚事業女性人數唔洗諗肯定高到傻。到時唔知又會流行咩模式既相睇活動呢?   封面圖片來源:imrexecutive.com

中國醫術正式打入美國市場,但係香港又點樣?

中國醫術正式打入美國市場,但係香港又點樣?

唔知大家對「屠呦呦」呢個名有無印象呢?呢個人係2015年諾貝爾醫學獎得主黎架,用黎表揚佢利用中醫知識研發出抗瘧疾藥,挽救左無數貧困地區既生命。另一方面,擁有347年歷史既老字號中藥舖「北京同仁堂」尋日係紐約創始店搞左個開幕記者會上宣布進軍美國,總經理丁永玲話希望透過中式醫藥服務同建立生活觀念令到美國民眾親身感受到中國傳統醫藥既奧妙神奇咁話wor。   唔講唔知,原來美國係2002年開始正式俾中醫藥進入補充替代醫學系統,依家有51個州已經設立左中醫藥既相關法律規範,依家北京同仁堂成千種中藥產品當中暫時得10種成功通過FDA認證以「食品補充劑」既形式係市面出售,包括大家成日都聽到既六味地黃丸、牛黃丸、十全大補丸咁。     內地中醫藥行業大舉進軍美國市場,咁香港又點呢?中醫依家係香港既地位其實係高不成低不就,自從中醫係2003年沙士一疫立功之後,大家就開始關注中醫既療效,大量打住中醫旗號既補健品亦都應運而生,咩冬蟲夏草、靈芝孢子既產品大行其道。政府亦都開始加大對中醫既投資。根據政府資料,醫院管理局自2003年起逐步係全港18區設立中醫教硏中心。政府亦係2014年既施政報告入面預留一幅土地準備起中醫院,話要將會提供中醫住院服務,但係去到2016年依然都只係紙上談兵。     雖然政府有意發展中醫產業,但係進度似乎相當緩慢,政府暫時都係拎唔出咩實質計劃出黎,而係制度上面仲係存在唔少差別對待既問題。例如話中醫師唔可以開西藥啦、唔可以轉介病人照X光同開化驗單等等,令唔到唔少病人寧願優先選擇西醫。另外,市民對於既觀念依然有誤解,例如覺得中醫本身唔夠科學、面對西醫個陣唔想同醫生講佢地有食中藥因為佢地覺得醫生會鄙視。如果政府唔好好教育市民大眾同儘快落實推動中醫既政策既話,恐怕中醫既地位只會繼續成為西醫既陪襯品。 封面圖片來源:mapio.net

2020年將會係無膠年代?可惜香港唔會有份

2020年將會係無膠年代?可惜香港唔會有份

封面圖片來源:ticotimes.net   岩岩先睇到新聞,話法國意識到塑膠污染既危險,近日成功立法,成為全世界第一個禁止出售不可分解塑膠餐具既國家。新法將會係2020年1月1日起正式生效,廠商到時要確保餐具用「生物可分解材料」製造。根據報道,法國每年製造47億個膠杯,但得大約1%成功回收。立法之後有關製造商會有4年緩衝期,確保所有即棄餐具可被生物分解、必須使用天然材料同禁止商家提供塑膠袋。     根據聯合報既報導,塑膠係全球最多人使用既材料之一,自1964年以黎塑膠生產量增加20倍,去到2014年已經去到3億100萬噸,預計未來20年仲會倍增。 塑膠既危害相信大家都好清楚,但係唔少人都認同塑膠確實好處多多,例如膠袋輕身又防水,膠刀膠叉方便攜帶,用完唔需要再沖洗的確好方便。但係同時塑膠因為無法被微生物分解需要極長時間先慢慢分解,而且大多數塑膠係分解過程中(無論係自然降解定係焚化)都會釋出有毒物質污染環境,最後隨住食物鏈累積再進入人體引起一連串既健康問題,而且流入大海之後仲會被動物誤食導致死亡,危害極大。有環保團體預計到左2050年,海洋入面既垃圾重量將多過魚類。真係諗起都毛管恫。     作為高度發展地區既香港,香港人既塑膠使用量同樣驚人。根據環保署最新資料,係2014年香港棄置既固體廢棄物當中至少20%係塑膠,重量竟然有成2,700噸,仲要係每一日!!!乘番一年365日,香港人每年dump左接近100萬噸既塑膠,創9年新高,但係回收率只佔全部回收廢物總量既0.05%左右,真係無眼睇。 睇下隔離既台灣,台北及台南政府部門同學校已經分別係今年及2006年起禁用即棄餐具,但香港到以依家仲未有法例規管。而環保署數據進一步顯示,2014年香港每日平均有43噸塑膠餐具被送去堆填區棄置,考慮到衛生問題,呢堆垃圾無可能會被回收,所以只會係堆填區下面發臭。     雖然香港政府近年亦都打算管制塑膠既應用,推出膠袋稅就係其中一個好例子,不過成效仍然有待定論。另一方面,就算香港政府有意進一步收緊對塑膠餐具既使用亦都會面臨飲食界(尤其是快餐店)既強烈反對,原因好簡單,使用生物降解既餐具成本比普通既貴好多,商家自然唔肯承擔。香港政府可以考慮係黎緊既一兩年進一步收緊對塑膠餐具既使用,例如向客人收取1蚊既餐具費迫使佢地自備餐具。不過管制塑膠應用任重而道遠,唔好話2020年,就算去到2030年香港都未必可以有效大幅減少塑膠既棄置量。