Posts Categorized: 打工辛酸秘史

香港打工仔嘅工時除左係世界第一之外,就連待遇都係世界級!

香港打工仔嘅工時除左係世界第一之外,就連待遇都係世界級!

作為世界大都市嘅香港雖然經濟相當繁榮,但呢個成果係唔少香港打工仔辛辛苦苦賣肝兼賣命先換得番黎。大家都知知香港嘅打工仔奴性一向極重,每個禮拜嘅工時都長,尤其係 IT、金融、飲食同服務業既 OT 情況最為嚴重,每日額外 OT 2-3個鐘是常識吧!     之前大家都應該有聽過一份由瑞銀發表嘅工時調查報告,當中比較左全球 71 個城市 15 種職業嘅工時數據,結果發現以全球黎計每個禮拜嘅平均工時係 36.23 個鐘,而香港就以 50+ 個鐘成功領先世界,比全球平均工時多出 38%,仲拋離排名第二及第三嘅孟買(43.78 個鐘)同墨西哥城( 43.48 個鐘)6 個鐘頭(相等於人地歐洲地方嘅一個工作天)有多添。     工時長唔緊要,不過對於大部份打工仔黎講,打份工除左要 OT 之外,仲要面對無料扮四條嘅腦細、例牌卸膊兼扮工嘅老屎忽、甚至係笑騎騎放毒蛇嘅同事呀!作為香港人,有得揀嘅話真係唔想係亞洲地區番工。做文職你就要識玩辦公室政治,就算係番苦力工一樣都唔會有好日子過!     近日最 hit 嘅話題一定係廁所清潔姐姐啦,根據某位「makeup artist/飄眉師/唇膏雕刻家/藝術家/插畫師」係佢 Facebook 分享嘅「故事」,係尖沙咀某大商場番工嘅清潔姐姐唔單止要向每一位入黎廁所嘅客人講再見之餘,仲唔可以係工時入面當著人面飲水同食野,搞到聲都沙埋!佢仲進一步指出,「原來佢地就算無野抹,個身體都要郁,因為企定定的話會比人話!如果比人影左相就會投訴去上面!總之工作咁多個鐘,就要不飲水不休息地做!!」你話啲上層係咪要逼到啲低下階層要痴線先滿意?好在,呢個 post 一出好快就已經引起熱烈討論,仲有議員係下面留言話會跟進呢件事添!(因為呢個情況如果屬實即係代表商場犯左勞工法例,對於管理商場嘅集團黎講係好大鍋)     香港社會一向奉行資本主義,腦細賺得越多代表越犀利,結果班打工仔就要受罪,又要爆肝又要肯蝕底,先唔講個最低工資連個茶記午餐都負擔唔起,依家就連飲水嘅基本權利都無。打工打到咁,再加上樓價繼續「世界第一」,你話香港人番工個陣又點會笑得出呀? 封面圖片來源:hk.ulifestyle.com.hk